ESPERANTO

Laste prilaborata estas la ĉina dublado, la DVD estos en 20 lingvoj

vinko — 2012-03-04T12:15:42Z

La dublado de la filmo preskaŭ finiĝis. La araba, angla, esperanta, franca, hispana, kaj rusaj versioj estas finprilaboritaj, kaj nun la ĉina estas laste prilaborata. Tiu ĉi parto de la laboro estis iom pli longa ol antaŭvidite pro diversaj teĥnikaj problemetoj rilataj al la etaj diferencoj en la longeco de la esprimoj en la diversaj dublitaj lingvoj, kiuj necesigas laŭlingvan fajladon de la bildotrako.

Subtitoloj estis fine kolektitaj por entute 13 lingvoj : finna, germana, hungara, itala, japana, korea, nederlanda, pola, portugala, reuni-kreola, rumana, serba, kaj sveda. Por 8 el ili, la definitve uzebla dosiero ankoraŭ atendas formatigon de la prizorgantoj de la tradukejo de E@I.

Do, la eldonita disko estos entute 20-lingva. SAT-EFK tutkore dankas al la tradukistoj, kiuj foje laboris en rekorde rapida tempo.

Pro la supre listigitaj pendantaĵoj, daŭre ne eblas anonci apero-daton por la disko, sed la prizorgantoj de la kooperativo faras sian eblon por kiel eble plej multe mallongigi la atendo-tempon, tamen respektante la laborritmon de volontuloj, de kiuj la projekto parte dependas.

Subtitoloj estas preskaŭ fintradukitaj

Vito — 2011-12-15T22:12:10Z

Depost la komuniko de la 24a de oktobro, kiu vokis al tradukado, la Esperanto-komunumo denove montris sian grandan efikecon por volontula laboro, plejparte helpe de la tradukejo starigita de E@I. En apenaŭ du monatoj pretiĝis aldonaj tradukoj por la germana, la itala, la japana, la portugala, la serba, la finna, la hungara, la korea, la nederlanda, la pola, kaj por la reuni-kreola lingvoj.

Komencitaj, sed ankoraŭ ne finitaj estas la tradukoj de subtitoloj al la ĉeĥa, litova k rusa lingvoj.


Kimie Markarian instruas sorobanon per Esperanto en svisa lernejo

La nura restanta tasko post finzorgo de tiuj pendantaĵoj estas enkorpigo de ĉiuj subtitoloj. Post tio la disko povos foriri al gravurejo.

La Eldona Fako Kooperativa de SAT daŭre dankas pro ilia pacienco ĉiujn antaŭmendintojn, kaj informos en tiu ĉi paĝo kiam la preciza aperodato estos konata.

Franclingva versio de ĉi artikolo legeblas sur la retejo de SAT-Amikaro : http://www.esperanto-sat.info/artic...

Traduku al via lingvo la filmon !

Vito — 2011-10-23T22:35:48Z

Karaj,

La antaŭenirado en pretigo de DVD pri la filmo "Esperanto" de Dominiko Gaŭtiero bone progresas, kiel vi povas legi tie :
http://esperantofilmo.com/spip.php?article19
Nun ni bezonas helpon de diverslingvaj esperantistoj, por atingi laŭeble plej multe da lingvaj versioj de la filmo subtitole, kiuj do povos aperi sur la produktota DVD (plejverŝajne estos 2 DVD, kio ebligas facile enmeton de 30o da subtitolaro diverslingve).

Kiel kontribui do ? Plej simple, iru al :
http://tradukejo.ikso.net/projektoj/20

Tie aperas priskribo de la tuto. Menciinde estas, ke por por eniri vi devos unue ensaluti per uzantonomo kaj pasvorto de lernu !.
Se vi ne jam havas, registriĝu do unue ĉe lernu ! :
http://eo.lernu.net/mia_lernu/registriĝu.php
Ekzistas dissendolistoj de E@I per kiuj varbeblas homoj kiuj jam kutimas pri la funkciado de la tradukretejo, sed nepras ke ankaŭ SAT-anoj k ĉiuj interesataj esperantistoj diskonigu vastskale la projekton k ne timu eniri la sistemon kaj kunlabori tie pri la multlingvigo de la subtekstoj. Se iu ne komprenus la interfacon (kiu estas sufiĉe intuicia tamen) ne hezitu peti min, mi laŭeble helpos/klarigos.

Por ekzemplo jen kiel aspektas la interfaco (ĉi tie por portugala versio) :
http://tradukejo.ikso.net/projektoj/20/pt


Ekrankopio de la tradukejo de E@I

Verde aperas la du unuaj fako, ĉar jam tradukitaj, k postaj estas ruĝaj (rozkoloraj), ĉar ankoraŭ tradukotaj. Por ektraduki (do frazon post frazo), simple alklaku la faketon "redakti" k entajpu rekte la cellingvan frazon.

Kiam vi ektradukos, atentu se estas komento pri tradukinda ĉeno/frazo (aperas "Montri komentojn (1)" aŭ simila nenula nombro sub la tekstokampo), ĉar tie troviĝas valoraj komentoj por tradukanto. Ofte tio ja estas nur informo pri la sekso de la parolanto aŭ origina formo de propra nomo, ne por ĉiu lingvo grava, sed indas ke ĉiu legu tion, ĉar tiel eviteblos iaj eraroj aŭ misetoj.

Post finredaktado ne forgesu savi la laboron alklakante la faketon "konservi" (paĝofine dekstre) !

Se multaj faras sian kontribueton dispartigante la tradukon iulingven kun aliaj esperantistoj samlingvaj, la tuto povas esti rapide finfarita.
Limdato estas fino de la monato, do restas ankoraŭ plena semajno por organiziĝi k plenumi la laboron. Ek al, kuraĝe antaŭen !

Grava atentigo : rusigo estas ankoraŭ ne prizorgita, kvankam ĝi nepras kiel oficiala UN-lingvo (nur la eksterbilda komento, kiu estos voĉe registrita — dublado —, jam estas tradukita, kvankam ne aperas en la tradukejo de E@I).

Bonan kunlaboron al ĉiuj... k diskonigu la aferon, ke eblu havi multe da lingvoj reprezentitaj en la fina DVD ! Antaŭdankon.
K, denove, ne hezitu turni vin la mi (ĉe : pimskrabo(ĉe)yahoo.fr) por ĉia demando aŭ peto pri tio, laŭbezone.

PAVito (= Plej Amike, Vito)

Dubladoj farataj !

Vito — 2011-10-04T23:02:55Z

Dum la tuta somero progresis la preparo k ekigo de tradukoj por dublado k subtitoligado de la nun finita filmo.
Nun estas registrataj, far profesiaj aktoroj la voĉoj por la dublitaj partoj (eksterbilda komentaro) por la ses lingvoj de UN (angla, araba, ĉina, franca, hispana, rusa) k Esperanto.
Paralele la subtitoligoj al kiel eble plej multe da aliaj lingvoj ekis pere de la tradukreto de E@I.
Do sufiĉe baldaŭ (certe antaŭ la jarfino) eblos finpretigi la DVD k ĝin sendi al la antaŭmendintoj, kies pacienco estas salutinda !

Por igi pli eltenebla la prokrastiĝon de la DVD-apero, jen bildeltiraĵo el la filmo :

Atende la ceteron, plu eblas antaŭmendi la filmon, por tiuj, kiuj ankoraŭ ne faris ;-)

Sukcesaj projekciadoj de la provoversio

vinko — 2011-06-13T10:48:46Z

La unua provoversio de la filmo estis antaŭpremiere prezentita dum la Internacia Renkontiĝo Esperantista ĉe Mediteraneo en Seto, dum la paska semajnofino. Fakte tie okazis du sinsekvaj projekciadoj. La unua okazis sabaton, la 23an de aprilo, en la urba kinejo de Seto. La dua okazis dimanĉon la 24an en la kongresejo, speciale por tiuj kongresanoj, kiuj ne ĉeestis kineje por la sabata projekciado. Dominiko Gaŭtiero mem enkondukis la filmon, prezentante sian propran laboperspektivon, dum Vito Markovo nome de la kooperativo aldonis kelkajn precizigojn pri la mendeblecoj. Malgraŭ amasa informado flanke de la organizantoj, kaj malgraŭ projekciado de alia filmo de Dominiko Gaŭtiero - pri ombrozonoj en la hispana kolektiva memoro - en la sama kinejo du semajnojn pli frue, la kvanto de eksteraj spektantoj estis minimuma dum la sabata vespero, kiu tamen celis unuavice eksteran publikon. Kompence, la ĉeestantaj esperantistoj ne ŝparis siajn komentojn, kio utilos por plifajnigo de tiu unua malneto.

Dua projekciado okazis en Fontano (Fontaine), apud Grenoblo, vendredon la 13an de majo, enkonduke al la Rodanalpa Esperanto-Kongreso. Malgraŭ la konkurenco de la samtempe okazanta malfermo de festivalo pri scienca filmado, interalie, ĉeestis proksimume 80 personoj, el kiuj 35 neesperantistoj. Martine Freydier, ĉeforganizanto de la kongreso, diris kelkajn enkondukajn vortojn, memorigante interalie ke Dominiko Gaŭtiero ricevis la premion "Jean Rouch", kiu rekompencas sciencajn kaj kulturajn verkojn, kiuj elstaras pro sia originaleco. Vinko Markovo poste enkondukis la filmon prezentante samtempe la kontribuon de la reĝisoro, kaj tiun de la kooperativo. Ĉi-foje la filmon sekvis vigla debato. Signifoplene, la unua intervenanto estis eksa instruistino pri la angla, antaŭe tre dubema pri Esperanto, sed fine konvinkita pere de la filmo pri ĝia intereso. Venis diversaj konstruaj kritikoj, interalie pri la nesufiĉa tutmondeco de la filmo kaj pri la relative malgrava loko dediĉita al infanoj kaj junuloj. Tio estas parte korektenda per enmeto de kelkaj pliaj intervjuoj, fintradukitaj en majo, sed ankaŭ iel respegulas la realan staton de la movado, kaj tie ni tuŝas la limon inter informado kaj propagando... Aliaj neesperantistoj bedaŭris, ke tute ne aŭdiĝas la voĉoj de kontraŭuloj de Esperanto, pri kio ja nenio estis antaŭvidita dum la filmado. Fine estis substrekite, ke pri la muntado plene respondecas la reĝisoro mem. La eldona fako kooperativa de SAT transdonas al li la komentojn, sed lasas lin libera mem finelekti, kiel trakti ilin. Krome kvar ĉeestantoj enskribiĝis por la venontjaraj kursoj en Fontano, kaj artikoleto pri la projekciado aperis la postan dimanĉon en loka gazeto.

Tria projekciado, multe pli diskreta, sed tamen anoncita en loka gazeto, okazis en sudfrancia vilaĝeto, Vergonjano (Vergoignan), en alternativa ekspoziciejo, la 22an de majo. Dominiko Gaŭtiero, regula vizitanto de tiu ekspoziciejo, mem ĉeestis. Tie la ĉeestantaro estis plene neesperantista. Temis pri sufiĉe postulema publiko, veninta unuavice por spekti ekspozicion pri desegnaĵoj kaj gravuraĵoj. Tamen, ankaŭ ĝi estis agrable surprizita de la filmo.

Kvara projekciado sukcese okazis en Plelin-Trigavuo (Pleslin-Trigavou), Bretonio.

Nun la filmo estas finmuntata, kaj baldaŭ estos tempo ekigi la tradukadon de la subtitoloj. La definitiva versio estos preta por la SAT-Kongreso en Sarajevo, kaj antaŭ tio ĝi estos projekciita ferme de la unua Internacia sendependa kinofestivalo en internacia lingvo Esperanto, Kino sen limoj, en Sao-Paŭlo la 13an de julio. Aliaj someraj projekci-lokoj estas pridiskutataj.

Intervjuo en Ĉina Radio Internacia

Vito — 2011-05-01T11:09:12Z

Dokumentofilmo Esperanto

Alklaku la aŭskultilojn por aŭdigi la intervjuon.

Saluton, karaj amikoj ! Vi nun aŭskultas E-elsendon de Ĉina Radio Internacia ! La Eldona Fako Kooperativa de SAT decidis post longa tempo produkti filmon pri Esperanto. Tiucele la kooperativo dungis neesperantistan filmiston Dominiko Gaŭtiero. Li komencis filmi novembre de 2009. Li samtempe malkovris kio estas Eo kaj ĝia historio kaj tre plaĉis al li la vivo de Zamenhof, kiun li prenis kiel "ruĝan fadenon" por la filmo. La filmo laŭplane estos dublita en la ses lingvoj de UN kaj subtitolita en kiel eble plej multaj lingvoj. Akceptante intervjuon de Ĉina Radio Internacia, franca esperantisto Vito Markovo tiuteme alportis al ni pli multe da detaloj.


Ĉina Radio Internacia intervjuata en Kubo

Karaj amikoj, la intervjuo aŭskulteblas ankaŭ en la esperantlingva retejo de Ĉina Radio Internacia http://esperanto.cri.cn
Se vi volas skribi ion al ni, bonvole sendu ĝin al la retadreso espradio ĈE cri.com.cn.
Pliaj informoj ĉe http://esperantofilmo.com/

Rekta ligo al la intervjuo :
mms ://media.chinabroadcast.cn/esperanto/filmo110426.mp3

Fonto : http://esperanto.cri.cn/641/2011/04...

Titolo de la filmo : "Esperanto" !

Vito — 2011-03-17T19:57:17Z

La filmo baldaŭ pretos, sed ankoraŭ mankas al ĝi definitiva titolo (la provizora -ĝis nun uzata, kvankam neoficiala- estas nura "Esperanto"). Jam estas iuj ideoj, sed la filmisto bonvenigas pliajn, k ĉiuj do estas invititaj fari siajn sugestojn ĉi tie (per komentoj). Atentu, ke se la proponojn vi evidente faru precipe esperant-lingve, gravas ĉefe la nacilingvaj formoj, kiujn trafos la neesperantista publiko !

Ĉar proksimiĝas la dato de la premiera projekciado en urba kinejo de Seto dum Interasocia Renkontiĝo de Esperanto ĉe la Mediteraneo (la 23an de aprilo), necesas nun tre rapide finelekti la definitivan titolon, do sendu viajn kontribuojn laŭeble plej rapide (antaŭ la 20a de marto prefere).

Dankon al la multaj proponintoj.
La finfine elektita titolo estas tutsimple : Esperanto.

Nova filmeto de Dominiko Gaŭtiero : La Senakvuloj

Vito — 2011-01-27T18:44:55Z

Dum li ankoraŭ ne finricevis ĉiujn transskribojn de la filmaĵoj por povi munti la filmon pri Esperanto, Dominiko ne ripozas !
Li ĵus publikigis dokumentfilmeton (9-minutan) pri krima agado de transnacia entrepreno, kiu rabas k poluas akvon en Ĉilio.
Pri Dominiko k lia filmaro vidu detale ĉe :
http://eo.wikipedia.org/wiki/Dominiko_Ga%C5%ADtiero
Vidu la fimeton :

Jen dokumentfilmeto de Dominiko Gaŭtiero k Johano Ortizo, kiu denuncas la fuŝegojn de transnacia "kanajla" firmao Minera Pelambres, kiu tute senpune forŝtelas la akvon de la kamparaj komunumoj centre de Ĉilio, k venenas la kelkajn restantajn akvofluetojn. Ĝi konstruis, meze de la Andoj, la plej grandan ĥemian rubujon de Sud-Ameriko. La "komunumanoj" rezistas de 10 jaroj. Fine de 2010, ili malsatstrikis dum 81 jaroj.

http://www.youtube.com/watch?v=PeTk0slmeNY

Ĉina Radio Internacia intervjuita en Kubo

Vito — 2010-11-07T20:25:59Z


Ĉina Radio Internacia intervjuata en Kubo

Raportas Serena :

La vetero de Havano estas ĉiam serena. Hodiaŭ ni, nome de ĉinaj esperantistoj, akceptis intervjuon de franca reĝisoro Johan-Dominiko Gaŭtiero pri la ĉina E-movado kaj evoluo de E-elsendo de Ĉina Radio Internacia. La reĝisoro Johan-Dominiko Gaŭtiero jam filmis unu semajnon en Bjalistoko dum la franca-germana kongreso, dum la kongreso de SAT-Amikaro, dum diskutregistrado, dum prelegoj en internacia Esperant-Muzeo en Vieno, ktp. Ĉifoje helpe de franca esperantisto Vinko Markov, la reĝisoro intervjuis sufiĉe multe da esperantistoj al la ĉifoja UK. La dokument-filmo temas pri esperantista movado kaj estos eldonata de la Eldona Fako Kooperativa de SAT venontjare.

Fonto : http://esperanto.cri.cn/802/2010/07...

La mendilo aperas

SAT-EFK — 2010-07-14T09:04:31Z

La nova mendilo (elŝutebla ĉi-tie : http://esperantofilmo.com/spip.php?...) jam alvenas de ĉe la presisto. Ĝustatempe por flugiri (normala vojo por flugfolioj) ĝis la Universala Kongreso en Kubo.